nairi camp | AGBU

2020 թվականի 44-օրյա պատերազմի փորձությունը վերապրած երեխաների համար 2021-ին ՀԲԸՄ-ն հիմնեց «Նաիրի» ամառային անվճար ճամբարը Հանքավանում: Հավատարմագրված մասնագետների կողմից իրականացվող զվարճալի միջոցառումների ու վերականգնողական դասընթացների միջոցով «Նաիրի» ճամբարը խթանում է ապաքինման գործընթացը: 2021-2024 թվականներին 7-13 տարեկան ավելի քան 1200 երեխաներ մասնակցել են ամառային ճամբարներին, այդ թվում՝ 2023 թ․ օգոստոսին Արցախի շրջափակման օրերին կազմակերված կարճաժամկետ ծրագրին։

Կազդուրվելու ու վերականգնվելու հնարավորություն

Արցախից բռնի տեղահանված ու Հայաստանում ապաստանած ընտանիքներին աջակցելու անհրաժեշտությունն անհամեմատ աճել է։ Ընդլայնելով արցախահայության ներգրավմանն ու հոգեբանական աջակցությանն ուղղված իր ծրագրերը՝ այժմ ՀԲԸՄ-ն իր «Նաիրի» ճամբարի շրջանակներում ամառային տասնօրյա ճամբարներից բացի առաջարկում է նաև ամենամսյա երկօրյա հավաքների շարք:

2024 թվականի փետրվարից Ծաղկաձորում գտնվող «Նաիրի» ընտանեկան ճամբարն անվճար հյուրընկալում է Արցախից բռնի տեղահանված երեխաներին ու նրանց մայրիկներին, ովքեր հնարավորություն ունեն հանդիպել հոգեբաններին, մասնակցել արվեստի ու երաժշտական թերապիաների և այլ միջոցառումների: Մինչ օրս «Նաիրի» ընտանեկան ճամբարում հյուրընկալել ենք 1069 երեխաների և նրանց 644 մայրիկներին:

Ճամբարային ծրագիրը ներառում է.

հոգեբանական աջակցության թերապիաներ
սթրեսի կառավարման և ֆիզիկական բարեկեցության դասընթաց
ձեռագործի աշխատարան
մասնագիտական ուղղորդման և ինքնաներկայացման սեմինար
ինտելեկտուալ և ակտիվ խաղեր
երեքանգամյա սնունդ
ուրախ ու հաճելի ժամանց

Ովքե՞ր կարող են մասնակցել ճամբարներին, ե՞րբ և ինչպե՞ս

«Նաիրի» ամառային ճամբարին կարող են մասնակցել Արցախյան երկրորդ պատերազմում նահատակված, գերի ընկած, վիրավորված, անհետ կորած հերոսների զավակները, քույրերն ու եղբայրները և Արցախից տեղահանված 7-13 տարեկան երեխաները: 2025 թվականի ճամբարի օրերը հասանելի կլինեն ավելի ուշ:

«Նաիրի» ընտանեկան ճամբարին կարող են մասնակցել 2023 թվականի սեպտեմբերի 24-ից հետո Արցախից բռնի տեղահանված 6-14 տարեկան երեխաներն ու նրանց մայրիկները: 2025 թվականի ճամբարի օրերը հասանելի կլինեն ավելի ուշ: