ՀԲԸՄ Կանանց հզորացման նախաձեռնության «Կին ձեռներեցներ» ծրագիրն օգնում է ձեռներեց կանանց բացահայտել իրենց իրական ներուժն ու բարելավել ձեռնարկատիրական գործունեությունը բիզնես դասընթացների, մենթորության ու խորհրդատվության միջոցով։
Գործարարությանը առնչվող տեսական քննարկումներից և գործնական աշխատանքներից բաղկացած եռամսյա դասընթացի ընթացքում մասնակիցները ստանում են այն բոլոր գիտելիքներն ու հմտությունները, որոնք անհրաժեշտ են բիզնեսը գրագետ և արդյունավետ վարելու համար։ Ավելին, ծրագրի ընթացքում մասնակիցները հնարավորություն են ստանում օգտվել մենթորների խորհրդատվությունից և բարելավել անգլերենի իմացությունը ՀԲԸՄ «Բիզնես մենթորներ» և ՀԲԸՄ «ԱՆԻ» ծրագրերի միջոցով։
Ծանոթանալով ձեռնարկատիրության, ֆինանսների կառավարման, մարքեթինգի և տեղական հարկային օրենսդրության հիմունքներին՝ մասնակիցները կարճ ժամանակում կարողանում են մշակել ճկուն և գրագետ բիզնես պլան, սահմանել իրենց բիզնեսի ուժեղ և թույլ կողմերը, մշակել ապրանքը շուկայում ճիշտ ներկայացնելու ռազմավարությունը և ավելին։ Բիզնես պլանն օգնում է բիզնեսը դիմակայուն դարձնել միջավայրի փոփոխություններին։
Ծրագրի ավարտին մշակված բիզնես պլաններից լավագույն երեքն արժանանում են փոքր դրամաշնորհների, որոնք մասնակիցներն օգտագործում են իրենց բիզնեսները զարգացնելու համար։ Ծրագրի բոլոր մասնակիցները միանում են ՀԲԸՄ-ի՝ անընդհատ ընդլայնվող շրջանավարտների ցանցին։ Անգամ դասընթացների ավարտից հետո ծրագիրը շարունակաբար ուղղորդում է մասնակիցներին, խթանում նրանց հետագա շփումն ու փորձի փոխանակումը ոլորտի փորձագետների հետ:
Ծրագրի հերթական խմբերի հավաքագրման մասին կտեղեկացնենք այս էջում։ Խնդրում ենք պարբերաբար հետևել էջին դիմելու ընթացակարգի վերաբերյալ հավելյալ տեղեկություններ ստանալու համար։
«Կին ձեռներեցներ»-ը Լյուքսեմբուրգում իրականացրեց ինտենսիվ վերապատրաստման դասընթաց տարբեր երկրների 26 սկսնակ ձեռներեցների համար՝ զինելով նրանց բիզնեսի վարման հմտություններով և գործիքակազմով, որպեսզի նրանք կարողանան կյանքի կոչել իրենց բիզնես գաղափարները:
Կարդացե՛ք ՀԲԸՄ «Կին ձեռներեցներ» ծրագրի ղեկավար Տաթևիկ Մանուկյանի հարցազրույցը Հայաստանում կանանց կյանքերը վերափոխող ՀԲԸՄ-ի «Կին ձեռներեցներ» ծրագրի մասին: Ծրագիրն առաջարկում է որակյալ բիզնես կրթություն և առաջխաղացում տարբեր ոլորտներում:
Լուսինե Պարոնյանն Իջևանից է, ով հանդիսանում է «Վանանե» ձեռագործ պայուսակների հիմնադիրը։ Մասնակցելով ծրագրին զարգացրել է իր ձեռնարկատիրական գիտելիքները, ձեռք է բերել մասնագիտական կապեր: Դիտե՛ք մեր շահառուների պատմությունները:
Ավարտվեց ՄԱԿ-ի Զարգացման ծրագրի հետ համատեղ իրականացվող «Կանանց տնտեսական հզորացումը Հարավային Կովկասում» ծրագիրը: 24 կին ձեռներեցներ ստացան փոքր դրամաշնորհներ, իսկ15-ն անցան աշխատանքային հմտությունների զարգացման եռամսյա վերապատրաստում:
Յուրաքանչյուր տարի ՀԲԸՄ կին ձեռներեցները մասնակցում են ամենամեծ Ամանորյա տոնավաճառ-ցուցահանդեսին, որն ապահովում է այդչափ կարևոր տեսանելիություն նրանց բիզնեսների համար: 2023-ի տոնավաճառ-ցուցահանդեսին մասնակցեցին 35 շահառու Հայաստանից ու Արցախից:
German Sparkassenstiftung Armenia-ի հետ համագործակցության արդյունքում ծրագրի շահառուներն անցնում են վերապատրաստում ֆինանսական և ձեռնարկատիրական գրագիտության և շուկայավարման գիտելիքների հարստացման վերաբերյալ:
