Նպատակ ունենալով խթանել Հայաստանի և Արցախի ձեռներեց կանանց գործունեությունը՝ ՀԲԸՄ «Կին ձեռներեցներ» ծրագիրը խրախուսում է ՓՄՁ սեփականատերերին բացահայտել իրենց իրական ներուժը՝ մասնակցելով բիզնես դասընթացների ու գործնական աշխատանքների: Համապարփակ այս ծրագիրն օգնում է Հայաստանի և Արցախի կին ձեռներեցներին ավելի լավ հասկանալ իրենց բիզնեսի էությունն ու առանձնահատկությունները, ինչպես նաև ուղղորդում նրանց՝ սեփական հաջողությունը առավելագույնի հասցնելու դժվարին ճանապարհին:
ՀԲԸՄ Կանանց հզորացման նախաձեռնության «Կին ձեռներեցներ» ծրագիրը ձեռներեց կանանց տրամադրում է 360º աջակցություն, որը ներառում է ձեռնարկատիրության, ֆինանսական կառավարման, մարքեթինգի և տեղական հարկային օրենսդրության, ինչպես նաև անգլերեն լեզվի դասընթացներ և մենթորություն։ Ծրագրի ավարտին տրամադրվում է նաև փոքր դրամաշնորհներ, որոնք մասնակիցներն օգտագործում են բացառապես իրենց բիզնեսները զարգացնելու նպատակով: Ի հավելումն, ՀԲԸՄ «Կին ձեռներեցներ» ծրագիրն ապահովում է շարունակական ուղղորդում, տրամադրում խորհրդատվություն և խթանում մասնակիցների հետագա շփումն ու փորձի փոխանակումը ոլորտային փորձագետների հետ: Վերջերս ՄԱԿ-ի զարգացման ծրագրի հետ ձեռք բերված համագործակցության արդյունքում Հայաստանի կանայք իրենց ձեռնարկատիրական գիտելիքներն ու մասնագիտական հմտությունները զարգացնելուց զատ, անցնում են նաև աշխատանքի տեղավորման համար վերապատրաստում:
Ժամանակակից աշխարհում բիզնես սկսել կամ ընդլայնել նշանակում է առերեսվել հարափոփոխ միջավայրին: ՀԲԸՄ «Կին ձեռներեցներ» ծրագիրը տրամադրում է 360 º աջակցություն՝ կրթելով և հզորացնելով Հայաստանի և Արցախի կին ձեռներեցներին: Ծրագիրն օգնում է իր շահառուների ճկուն բիզնես պլաններ մշակելու գործում, որն առաջնային է փոփոխություններին արագ և արդյունավետ արձագանքելու համար։ Ծրագիրը նաև բացառիկ հնարավորություն է ընձեռում ՀԲԸՄ Կանանց հզորացման նախաձեռնության շրջանավարտների և աջակիցների ցանցին միանալու համար: Ծրագրի կրթական փուլի բաղադրիչներն են.
• «Աշխատանքային հիմունքներ» տեսադասընթացների հասանելիություն
• Առաջնորդության հմտությունների ձևավորում
• Բիզնեսի պլանավորման և կառավարման դասընթացներ
• Ոլորտին հատուկ սեմինարներ և մասնագիտացված դասընթացներ
• ՀԲԸՄ ցանցերին անդամակցելու հնարավորություններ
• Սփյուռքում գործող բիզնես մենթորների հասանելիություն
• Անգլերեն լեզվի ուսուցում
• Փոքր դրամաշնորհային մրցույթներ և ֆինանսավորման հնարավորություններ
• Շարունակական մոնիթորինգ և խորհրդատվություն
Ծրագրի հերթական խմբերի ընդունելությունը կսկսվի մայիս-հունիս ամիսներին: Հետևե՛ք ծրագրի վերաբերյալ թարմացումներին այս էջում:
ՀԲԸՄ «Կին ձեռներեցներ» ծրագրի հերթական խմբերի հավաքագրումը կսկսվի մայիս-հունիս ամիսներին: Ծրագրին կարող են միանալ Հայաստանում և Արցախում ձեռներեցությամբ զբաղվող կանայք: Դիմումների ընդունման կարգն ու վերջնաժամկետը կներկայացվի այս էջում ավելի ուշ:
ՀԲԸՄ «Կին ձեռներեցներ» ծրագրի շահառու Անուշ Սարոյանն է Գյումրիից, ով, մասնակցելով ծրագրին, կարողացավ կյանքի կոչել իր վաղեմի երազանքն ու Գյումրիի կենտրոնում բացեց սեփական նորաձևության տունը: Դիտե՛ք մեր շահառուների հաջողված պատմությունները:
ՀԲԸՄ «Կին ձեռներեցներ» ծրագիրն այսուհետ հասանելի է դարձել Հայաստանի մարզերում: Բացի Երևանից, Շիրակում, Գեղարքունիքում և Տավուշում ևս կազմակերպվեցին ձեռնարկատիրական հմտությունների զարգացման դասընթացներ: Ավարտին 115 մասնակիցներից 29-ն արժանացան դրամաշնորհների իրենց բիզնեսները զարգացնելու համար:
ՀԲԸՄ «Կին ձեռներեցներ»-ի և ՄԱԿ-ի Զարգացման ծրագրի հետ համատեղ իրականացվող «Կանանց տնտեսական հզորացում Հարավային Կովկասում, փուլ II» ծրագրում ընդգրկեցին Երևանի, Գեղարքունիքի և Շիրակի մարզերի կանայք: 170 կին վերապատրաստում անցավ՝ բարելավելով աշխատանքային հմտությունները, իսկ 68 կին ձեռներեցներ ձեռք բերեցին բիզնեսի վարման գիտելիքներ:
Յուրաքանչյուր տարի՝ դեկտեմբեր ամսին, ՀԲԸՄ կին ձեռներեցները մասնակցում են ամենամեծ Ամանորյա տոնավաճառ-ցուցահանդեսին, որն ապահովում է այդչափ կարևոր տեսանելիություն նրանց բիզնեսների համար: Այս տարի տոնավաճառ-ցուցահանդեսը տեղի ունեցավ դեկտեմբերի 23-27-ը, որին մասնակցեց 40 շահառու Հայաստանից ու Արցախից:
Գործե՛ք հանուն մարդկության բարօրության: Նվիրաբերե՛ք այսօր:
