Նկար
ՀԲԸՄ Կանանց հզորացման նախաձեռնության «Կին ծրագրավորողներ» ծրագիրն օգնում է կանանց ձեռք բերել նոր գիտելիքներ, մուտք գործել տեղեկատվական տեխնոլոգիաների (ՏՏ) ոլորտ և աշխատաշուկայում դառնալ մրցունակ։ Ծրագիրը տրամադրում է ՏՏ ոլորտի դասընթացներ, որոնք օգնում են զարգացնել հմտություններն ու տիրապետել ժամանակակից գործիքներին, ինչպես նաև կապեր հաստատել ոլորտի առաջատար մասնագետների հետ։
ՏՏ-ն ամենաարագ փոփոխվող ոլորտներից է։ Հետևաբար, ընդունելության յուրաքանչյուր շրջանի առաջարկվող դասընթացները կարող են տարբերվել նախորդից, քանի որ ՀԲԸՄ-ն պարբերաբար խորհրդակցում է ոլորտի մասնագետների և գործատուների հետ և դասընթացներ կազմակերպում ըստ տվյալ պահի մասնագիտացումների պահանջարկի։ Մինչ օրս դասավանդվել են React JS, Nօde JS, Angular JS, DevOps, PHP, Python, UI/UX Design, QA, IT Project Management, Product Management, HR in Tech դասընթացները:
Բացի բուն մասնագիտական դասընթացներից, ծրագրի շահառուները հնարավորություն ունեն.
- ծանոթանալ ՏՏ ոլորտին, դրան առնչվող տարատեսակ ուղղություններին և ՏՏ ծրագրերի կառավարման գործիքներին,
- մասնակցել ալգորիթմների, Լինուքս և Քլաուդ համակարգերի վերաբերյալ լրացուցիչ դասընթացների,
- մասնակցել թեմատիկ հանդիպումների, ինչպիսիք են՝ կիբերանվտանգությունը, ամպային հաշվարկները և դիզայն մտածողությունը,
- տիրապետել նախագծերի կառավարման մի շարք ծրագրերի, ինչպիսիք են՝ Jira, Asana, Confluence, Trello,
- զարգացնել փափուկ հմտությունները (soft skills)՝ օգտվելով ՀԲԸՄ-ի պատրաստած կարճ տեսադասընթացներից,
- աշխատել ՄՌԿ մասնագետի հետ՝ կազմելու գրագետ ինքնակենսագրական և ձեռք բերելու հարցազրույցը հաջող անցնելու հմտություններ,
- զարգացնել՝ որպես ֆրիլանսեր ժամանակը ճիշտ կառավարելու հմտությունները,
- ստանալ մասնագիտական խորհրդատվություն սփյուռքի փորձագետների կողմից:
Ծրագրի ավարտին քննությունները հաջող հանձնած մասնակիցները կստանան հավատարմագրված վկայականներ, որոնք աշխատաշուկա մտնելու իրենց այցեքարտը կդառնան։
